Wednesday, July 21, 2010

අපේ ප්‍රින්ටඩ් සර්කිට් බෝඩ් අපිම හදාගනිමු!

අද පෝස්ට් එකෙන් කතා කරන්න හදන්නේ ගෙදරදීම ලස්සනට ප්‍රින්ටඩ් සර්කිට් බෝඩ් හදා ගන්නේ කොහොමද කියලා.ඒත් ඒකට කලින් ප්‍රින්ටඩ් බෝඩ් ගැන පොඩි විස්තරයක් කරන්නම් ආදුනිකයෙකුට ගොඩක් ප්‍රයෝජනවත් වේවි.
ප්‍රින්ටඩ් බෝඩ් එකක් කියන්නේ ඉපොක්සි(ෆයිබර්‍ර ග්ලාස් වගේ දෙයක්) වලින් හදපු තුනී බෝඩ් වර්ගයක්. මේකෙ යට පැත්තේ තඹ වලින් විදුලිය ගමන් කරන්න සකස් කරපු පාත් තියනවා.මේ බෝඩ් එකේ ඉහල පැත්තේ ප්‍රින්ට් කරලා තියනවා සවිකරන්න ඕන උපකරණ. අපි වෙලඳපොලෙන් මේ බෝඩ් එකක් මිලදී ගත්තොත් නම් අපිට තියෙන්නේ උපාංග ටික සවි කරලා යටිපැත්තෙන් ඊයම් වලින් පාස්සන්න විතරයි.හැබැයි අපට අවශ්‍ය හැම සර්කිට් එකකටම අවශ්‍ය බෝඩ්ස් මිලදී ගන්න විදියක් නැහැ.අනිත් එක තමයි අපිම ප්‍රින්ටඩ් බෝඩ් හදා ගත්තොත් ගොඩක් අඩුවියදමෙන් හදා ගන්න පුලුවන්.
මේක වයිට් කොලර් ජොබ් එකක් නෙමෙයි කියලා ඉස්සර වෙලාම කියන්න ඕන. රසායන ද්‍රව්‍ය එක්ක කරන වැඩක් තියනවා ඒක නිසා පොඩ්ඩක් ප්‍රවේසමෙන් තමයි කරන්න වෙන්නේ.
මුලින්ම මෙක කරන්න අවශ්‍යවෙන මූලික සංකල්ප ටික කියන්නම්. මේකට අපිට අවශ්‍ය වෙනවා කොපර් ක්ලැඩ් බෝඩ්(කොපර් බෝඩ් කියලත් කියනවා) කැබැල්ලක්.මේවා සාමාන්‍ය වෙරෝ බෝඩ් 1ක් තරමට ගනකම තියන බෝඩ් වර්ගයක් හැබයි මේකේ සිදුරු මොනවත් නැහැ යට පැත්තේ තියෙන්නේ තනි කොපර් තහඩුවක්.ඇත්තටම ප්‍රින්ටඩ් බෝඩ් කියලා කියන්නේ මේ කොපර් ක්ලැඩ් බෝඩ් එකක්ම තමයි මේකේ යට පැත්තේ තියන තනි තඹ තහඩුවේ අපිට අනවශ්‍ය කොටස් ටික අයින් කරලා අපිට අවශ්‍ය කරන පාත් වල හැඩයට තඹ ඉතුරු කරගෙන අවශ්‍ය තැන් වල උපකරණ සවි කරන්න සිදුරු සකස් කරලා තියනවා.මේ අනවශ්‍ය තඹ කොටස් ඉතුරු කර ගන්නේ රසායනික ක්‍රමයක්.එකේ පියවර ටික මෙහෙමයි.

01.අවශ්‍ය පරිඵතයට සරිලන ප්‍රින්ටඩ් බෝඩ් සටහනක් සොයා ගැනීම හෝ සකස් කර ගැනීම
02.අවශ්‍ය ප්‍රමානයට කොපර් ක්ලැඩ් බෝඩ් කැබැල්ලක් කපා ගැනීම.
03.කොපර් බෝඩ් කැබල්ල විම් වලින් හොඳින් පිරිසිදු කර ගැනීම (තඹ සහිත පැත්ත )
04.කලින් සකස් කරගනිපු ප්‍රින්ටඩ් බෝඩ් සටහන කොපර් බෝඩ් එක මත ඇඳගැනීම.මේ සඳහා අනිවාර්ය්‍යයෙන්ම ජලයෙන් සේදී ඉවත් නොවන තීන්ත වර්ගයක් පාවිච්චි කරන්න.
05.ෆෙරික් ක්ලෝරයිඩ් කැට දියකරලා සකස් කරගන්නා ලද හෝ වෙලඳ පොලෙන් මිල දී ගත් ෆෙරික් ක්ලෝරයිඩ් ද්‍රාවනයක, අනවශ්‍ය කොපර් කොටස් සියල්ල ඉවත් වනතෙක් සකස් කරගන්නා ලද කොපර් බෝඩ් එක ගිල්වා තැබීම.
06.පසුව කොපර් බෝඩ් එක ද්‍රාවනයෙන් ඉවතට ගෙන හොඳින් සෝදා වියලා,අවශ්‍ය තැන් වල සිදුරු විද භාවිතා කිරීම.

මී ලඟට ඉහත පියවර එකින් එක කරගන්න විදිය බලමු.

01-පියවර
මෙක එච්චරම අමාරු නැහැ ගොඩක් ජනප්‍රිය පරිඵත වලට නම් නෙට් එකේ හෙවුවොත් හොයා ගන්න පුලුවන්.එහෙම හොයාගන්න බැරිවුනොත් පී.සී.බී ඩිස්යිනින් ටූල් එකක් පාවිචි කරලා එකක් අපිටම හදාගන්න පුලුවන්.මේකට ජනප්‍රියම ටූල් එක තමයි ඊගල් පීසීබී කියන එක.එත් මම නම් පාවිච්චි කරන්නේ පිසීබී ක්‍රියේටර් කියලා ටූල් එකක් පොඩ්ඩක් නෙට් එකේ සර්ච් පාරක් දැම්මොත් ඕනතරම් ෆ්‍රී ටූල්ස් හොයාගන්න පුලුවන්.කොහොමත් එකම ටූල් එකක් දිගටම පාවිචිකරන එක හොඳයි මම හිතන්නේ.

02-පියවර
මේක කලින් එකටත් වඩා ලේසියි.ප්‍රින්ටඩ් බෝඩ් ඩිසයින් එක ඇඳගන්න පුලුවන් අවම සයිස් එකේ කොපර් බෝඩ් කැබැල්ලක් කපා ගන්න ඕනේ.මේ කොපර් බෝඩ්ස් මිලදී ගන්න තියෙන්නේ එක්කෝ කිරලා කිලෝ ගානට නැත්තම් එක එක ප්‍රමානයේ සයිස් වල කැබලි විදියට(උදාහරන විදියට අඩි1x1,අඟල්6x6). ලාභම විදියතමයි කිරලා ගන්න එක එත් නිතරම පීසීබී හදන්නේ නැත්නම් එක ගොඩක් පාඩුයි(කිලෝ එකක මිල ටිකක් ලොකුයි ඒ වගේම විශාල බෝඩ් කැබැල්ලකුත් ලැබෙනවා ) නැත්නම් කැබලි විදියට ගන්න කොට තියන ලොකුම ප්‍රමානයේ එක ගත්තාම එක වර්ග අඟලකට අඩුම වියදමක් යනවා.කොහොම හරි පීසීබී ඩිසයින් එකට වඩා සෙ.මී 0.5ක් විතර ලොකු කොපර් බෝඩ් කැබැල්ලක් කපා ගන්න එක ලේසියි.මේක කපා ගන්න හයි ස්පීඩ් හැක්සෝ බ්ලේඩ් එකක්(ලෝහ කැපීමට ගන්නා කියත් පටියක්/යකඩ කියත් පටියක්) පාවිචි කරන්න පුලුවන්.මෙහිදී සැලකිලිමත් වෙන්න ඕනේ කොපර් තහඩුව තියන පෘශ්ඨය උඩට තියන විදියට තියා ගෙන කැපීම සිදුකරගන්න.මෙහෙම කරහම කොපර් තහඩුව බෝඩ් එකෙන් ගැලවිලා යන්න තියන සම්භාවිතාව අඩුයි.

03-පියවර
මේක සේරටම වඩා ලේසියි අම්මගෙන් ඉල්ල ගන්න විම් කැටේ ඊට පස්සේ ස්පොන්ජ් කෑල්ලක විම් ටිකක් ගාලා කොපර් බෝඩ් එකේ තඹ තහඩුව තියන පැත්ත හොඳට සුද්ධ කර ගන්න.ඊට පස්සේ කොපර් බෝඩ් එක හොඳට වියලා ගන්න.ආ මතක ඇතුව විම් කැටේ ආපහු අම්මට දෙන්න.පස්සේ අම්මගෙන් ඉල්ල ගන්න තවත් දේවල් තියනවා විම් කැටේ දුන්නේ නැත්නම් ඒවට සොරි තමයි!



04-පියවර
මේක තමයි අමාරුම එක.දැන් අපි කලින් හදාගනිපු පීසීබී ඩිසයින් එක කොපර් බෝඩ් එකට පිටපත් කර ගන්න එක බලමු.එක ක්‍රමයක් තමයි අතින් අඳින එක කරන්න ඕනේ පීසීබී ඩිසයින් එක කාබන් කොලයක් තියල කොපර් බෝඩ් එකට පිටපත් කරලා ඒ පාත් සේරම වතුරෙන් සේදී නොයන තීන්ත ජාතියකින් පාට කර ගන්න එක මේකට පර්මනන්ට් මාකර් පෙන් තමයි සාමන්‍යයෙන් පාවිච්චි කරන්නේ පුන්චි තුඩක් තියන මාකර් එකක් නම් වඩා හොඳයි(මතක ඇතුව පර්මනට් මාකර් එකක් හොයාගන්න මේවායින් ලිවුවාම මැකෙන්නේ නෑ).මතක ඇතුව මෙකෙන් අඳිද්දී ගොඩක් තදට පාට කරන්න 2 වතාවක් වත් එක ඉරක් උඩ අඳින්න ඕන.විකල්පයක් විදියට ටිපෙස්ට්(අර පෑන් වලින් ලිවුවාම මකන්න ගන්නේ) පාවිච්චි කරන්න පුලුවන්.එහෙම නැත්නම් නිය ආලේපන /කියුටෙක්ස් (මේවා නැත්නම් නංගිගෙන් හරි ගර්ල් ෆ්‍රෙන්ඩ්ගෙන් හරි ඉල්ලගන්න)පාවිච්චි කරන්නත් පුලුවන් මේක පින්සලකින් ගාන්න ඕන නිසා අඳින්න පොඩ්ඩක් අමාරුයි හැබයි මෙවා වතුරට කොහොමවත් දිය වෙන්නෙ නැති නිසා මේක අනිත් දෙකටම වඩා හොඳයි මම හිතන්නේ.කොහොම හරි අන්තිමට වෙන්න ඕන පීසීබී ඩිසයින් එක නිවැරදිව කොපර් බෝඩ් එක මතට පිටපත්කර ගැනීමයි.මෙහීදී සැලකිලිමත් වෙන්න ඕන ප්‍රින්ටඩ් බෝඩ් ඩිසයින් එක නිවැරදි පැත්තටද පිටපත් වෙලා තියෙන්නේ කියලා මීට හේතුව වෙන්නේ සමහර ටූල් වලින් ඩිසයින් කරන බෝඩ් එකට පිටපත් කරන්න වෙන්නේ මිරර් කරලා(පින්තූරය කණ්නාඩියකින් බැලුවාම පෙනෙන විදියට පැත්ත මාරුකරලා)ඩිසයින් එක කොපර් බෝඩ් එකට ගන්න තියන එකම ක්‍රමය මේක නෙමෙයි.තව ක්‍රම බොහොමයක් තියනවා.උදාහරනයක් විදියට බෝඩ් විශාල ප්‍රමාණයක් නිශ්පාදනය කරනවා නම් සිල්ස්ක්‍රීන් ප්‍රින්ට් (ස්ක්‍රීන් ප්‍රින්ටින් ) ක්‍රමයට ඩිසයින් එක බෝඩ් එකට ප්‍රින්ට් කරන්න පුලුවන්.අපිට ගෙදරදී කරන්න පුලුවන් ගොඩක් ලේසි විදියක් මම අන්තිමට සඳහන් කරන්නම් මේ විස්තර හුදෙක් දැනුම සඳහායි.

05-පියවර
මේක තරමක් පරෙස්සමෙන් කරන්න වෙන පියවරක්.රසායන ද්‍රව්‍ය එක්ක වැඩකරන්න වෙන්නේ.මුලින්ම ෆෙරික් ක්ලෝරයිඩ් කැට හරි දියරය හරි ඉලෙක්ට්‍රොනික් කඩේකින් හරි කෙමිකල් ස්ටෝස් එකකින් හරි ගන්න පුලුවන්.සකස් කරපු දියරය ගත්තොත් වැඩේ ලේසියි හැබැයි ගාන පොඩ්ඩක් වැඩියි.කැට ගත්තොතින් අපිට දියරය හදාගන්න වෙනවා මේකේ වාසි තියනවා ෆෙරික් ක්ලෝරයිඩ් වාතයට නිරාවරනය වෙලා ගොඩක් දවසක් තිබුනොත් එක ටිකක් සවුත්තු වෙනවා එක නිසා දියර මිලදී ගත්තොත් පොඩ්ඩක් පරිස්සමෙන් අරන් තියන්න වෙනවා.කැට මිලදී ගත්තොත් අපට අවශ්‍ය ප්‍රමානය විතරක් දියකරගන්න පුලුවන්.මේ කැට අනිවාර්ය්‍යෙන්ම ප්ලාස්ටික් හෝ වීදුරු භාජන වල තමයි දියකරන්න ඕන.මේ කැට මිලදී ගත්තාට පස්සේ පාවිචිකරනකම් සීල් කරපු පොලිතින් කවරයක දාලා ප්ලාස්ටික් ටින් එකක වාත‍ය ඇතුලු වෙන්නේ නැති විදියට ආවරනය කරලා තියන්න ඕන.මෙවාට හුලං වැදුනොත් දියකරන්න ඉතා අපහසු ජෙලි වගේ තත්වයකට පත්වෙනවා.මේ කැට දිය කරන්න ඕන මෙහෙමයි සාන්ද්‍රනය ඉතා වැදගත්.සාන්ද්‍රනය ෆෙරික් ක්ලෝරයිඩ් ග්‍රරෑම් 50 :පිරිසිදු ජලය මිලිලීටර්100,
(0.5ලීටරයටකිලෝග්‍රෑම්/0.5Kgl-1) පොඩ්ඩක් පුරුදු වුනාම සාන්ද්‍රනය අඩු වැඩිකරලා පාවිච්චි කරන්න පුලුවන්.මේවා දියකරන්න ඕන මෙහෙමයි අනිවාර්ය්‍යෙන්ම ප්ලාස්ටික් භාජනයක් අරගන්න ඒකට මේ කැට දාලා යාන්තමට අතදාන්න පුලුවන් තරමේ උනුසුම් ජලය අවශ්‍ය තරමට සෙමේන් එකතු කරන්න.ඒ එකතු කරන ගමන් වීදුරු හෝ ප්ලාස්ටික් කූරකින් හොඳින් කවලම කරන්න.කිසිම වෙලාවක ලෝහ මේ ද්‍රාවනයට එකතු වෙන්න දෙන්න එපා.මේවා දිය කරද්දී මුහුන මේ ද්‍රාවනයෙන් හැකිතාක් ඈත් කරලා තියාගන්න අතින් අල්ලනවා නම් අනිවාර්යෙන්ම ග්ලවුස් 2ක් පාවිච්චි කරන්න.මේ කැට හරි දියර හරි රෙදිවල(අනෙක් දේවල් වල වුනත් මෙහෙම තමයි ) තැවරුනොත් කරන්න දෙයක් නෑ අයින් කරන්න කිසිම විදියක් නෑ. ඒ වගේම තමයි මේක ඇස්වල තැවරුනොත් වහාම ඩොක්ට කෙනෙක්ට පෙන්වන්න වෙනවා.ඒ වගේම තමයි මේ දියර හරි කැට හරි පුන්චි ලමයින්ට අහුවෙන තැන් වල තියන්න එපා.
මේ දියරය සකස් කරාට පස්සේ කලින් සකස් කරපු කොපර් බෝඩ් එක මේ දියරයේ ගිල්වලා තියන්න වෙනවා.මේකට පතුල ගොඩක් පැතලි භාජනයක් හොයා ගත්තොත් වැඩේ ලේසියි දියරය ඉතා කුඩා ප්‍රමානයකින් සම්පුර්ණ බෝඩ් එකම වැහෙන්න සකස් කරගන්න පුලුවන්.බෝඩ් එක මේ දියරයේ ගිලවන්න කලින් ප්ලාස්ටික් නූලක් බෝඩ් එකට ගැට ගහන්න.දියරයේ ගිල්වුවාට පස්සේ විනාඩි 5න් 5ට පිටතට අරන් බලන්න අපිට අනවශ්‍ය තඹ කොටස් සියල්ල ඉවත් වෙලාද කියලා අනවශ්‍ය කොටස් සම්පූර්ණයෙන් අයින් වුනාම බෝඩ් එක ද්‍රාවනයෙන් වහාම ඉවත් කරගෙන පිරිසිදු ජලයෙන් සෝදා පිරිසිදු කරගන්න.

06-පියවර
ඊට පස්සේ තිනර් වගේ දෙයකින් අපි අර ඇඳපුවා අයින් කරගන්න .ඊටත් පස්සේ ආපහු විම් වලින් හොඳට හෝදලා වියලලා ගන්න.ඊට පස්සේ අවශ්‍ය තැන් වල සිදුරු විදලා පාවිච්ච්යට ගන්න පුලුවන්. සිදුරු විදිද්දී 0.8mm - 1mm වගේ කටුවක් පාවිච්චි කරන්න.මේ තරම් පුන්චි කටු සාමන්‍ය ඩ්‍රිල් එකකට සවිකරන්න බෑ මම නම් පාවිච්චි කරන්නේ මා විසින්ම සකස් කර ගනිපු ඩ්‍රිල් එකක් තමයි.ඔයාලටත් හදාගන්න හැටි අවශ්‍යනම් කමෙන්ට් එකක් දාන්න(රුපියල් 400ක් විතර වියදම් වුනා ). කඩේ ගන්නත් තියනවා හොයන්න අමාරුයි මිල රුපියල් 1750ක් හෝ ඊට වඩා වැඩියි.ඩ්‍රිල් කටුවක් නම් රුපියල් 25ක් විතර තමයි වෙන්නේ.

මීලඟට ලියන්නේ පීසීබී හදාගන්න මම ප්‍රායෝගිකව පාවිච් කරන ක්‍රමය.

9 comments:

  1. සුබ අනාගතයක් !

    ReplyDelete
  2. http://gryphes.tk/#

    ReplyDelete
  3. ela machoooo ela,,ubata puluwannam podi robot la hadana hatit kiyapan.....good luck machooo...

    ReplyDelete
  4. වටිනා ලිපියක්, මම නම් බාවිතා කරන්නේ පි.සි.බී. එක්ස්ප්‍රස් කියන මෘදුකාංගයයි, එකෙන් ඇඳලා ස්ටිකර් කොලයකට ප්‍රින්ට් අවුට් එකක් අරගෙන, එක පෙපර් කටර් එකකින් කපාගෙන කොපර් කැලැඩ් බෝඩ් එකේ අලවලා ස්ප්‍රේ ටින් එකකින් ස්ප්‍රේ කරලා, ඊට පස්සේ ස්ටිකර් කොලය ගලවලා ෆේරික් ක්ලොරයිඩ් වල දාලා අනවශ්‍ය තබ ඉවත් විමෙන් පසුව ටිනර් වලින් සොදා ග්‍රිල් කරනවා

    ReplyDelete
  5. PCB vidina drill eka hadana vidiyath dannako...pls..

    ReplyDelete
  6. අනේ මචංල.......පොඩ්ඩක් උදව් කරනවද..? eagle සහ තව බොහෝ free pcb creating tools සපෝට් කරනේ 2 layer ඉදන් ඉහළට නේ. ඒවගෙන් single layer pcb create කර ගන්නේ කොහොමද.....?

    ReplyDelete
  7. ගොඩක් ස්තුතියි බන් . මන් පි.සි.බ් හදුවා එත් හිල් විදින්නේ කොහොමද ?

    ReplyDelete
  8. Watch this https://m.youtube.com/watch?v=pJi57NBXmY0
    See this also http://electronicbox2158.blogspot.com/2013/

    ReplyDelete

ගල් මුල්,අදහස්,ප්‍රශ්න සේරම මේකේ ලියලා යන්න